Kryetari i Aleancës për Ardhmërinë e Kosovës (AAK), Ramush Haradinaj, ka bërë të ditur se deputetët e këtij subjekti politik nuk do të marrin pjesë në seancën për zgjedhjen e presidentit të vendit.
Në një deklarim për media para fillimit të seancës, Haradinaj ka thënë se procesi është iniciuar pa konsultim dhe pa ndonjë marrëveshje paraprake politike.
Ai ka shtuar se, po të ishin përfshirë nga fillimi në proces, AAK do të mund të kontribuonte në zgjidhje.
“Jo, nuk do të jemi pjesë e seancës. Kjo është një lëvizje që është bërë pa konsultë, pa dakordim dhe pa asnjë marrëveshje paraprake. Ne realisht na kanë përjashtuar prej bashkëpunimit për të gjetur një zgjidhje.Ndoshta sikur të kishim qenë pjesë e procesit nga fillimi, me siguri do të kishim mundur të ndihmonim. Ajo që është me rëndësi është që të mos vazhdohet me shkelje të Kushtetutës, pra me votim pa kuorum, sepse kjo e çon vendin në drejtim të rrezikshëm”, ka deklaruar Haradinaj.
I pyetur se a i dëgjoi kritikat e kryeministrit, Albin Kurti që i drejtoi opozitës gjatë një konference për medie që ai mbajti sot, kreu i AAK-së tha se ka kohë që nuk i sheh fjalimet e tij.
“Ka një kohë që nuk shoh fjalime të tij”, ka thënë shkurt Haradinaj./teve1.info/
