Presidentja Vjosa Osmani mori pjesë në përurimin e fabrikës ‘’Happy Chicken’’ në Korishë të Prizrenit, e cila filloi me plasimin e produkteve vendore në treg. Osmani e quajti këtë investim të rëndësishëm dhe ndikues në zhvillimin ekonomik të vendit.
Hapësirat për punë janë gati.
E produktet vendore janë të gatshme për shitje.
Ndërsa të gjithë komplekset e kompanisë ‘’Happy Chicken’’në Korishë të Prizrenit, sipas drejtorit Naim Ukaj janë më modernet në rajon.
“Zogjtë i marrim një ditor, kryesisht i kemi marrë në Hungari, i rrisim vet, kemi katër komplekse të rritjes me kapacitet 25 mijë zogj secila. Janë komplekset më moderne që ekzistojnë në rrjetin dhe teknologjinë e mishit të zogjve bojlerë. Në 32 ditë fillojmë therrjen e tyre edhe për gjashtë ditë e therrim një kompleks”, tha drejtori i kompanisë, Naim Ukaj.
Ndërsa e gjithë kjo punë sipas tij është bërë vetëm me investime private.
“Nuk kemi pasë asnjë përkrahje prej institucioneve, është bashkë-investim me një kompani zvicerane që e kemi ortak. Mund të themi që investimi është tërësisht privat. Presidentes t’i tregojmë se edhe ne ekzistojmë, edhe ne punojmë edhe t’na vizitojë e t’i lëshojë sytë edhe nga ne”, tha Ukaj.
Ndërkaq për përurimin e kësaj kompanie erdhi edhe presidentja e Kosovës, Vjosa Osmani.
Ndërsa interesimi nga ana e të parës së shtetit për këtë fabrikë ishte i madh.
E pas vizitës, Osmani e quajti këtë investim të rëndësishëm dhe që do të ndikojë në zhvillimin ekonomik të vendit, në rritjen e vendeve të punës, si dhe në uljen e importit nga jashtë për produktet ushqimore.
