Kryetari i PDK-së Bedri Hamza ka deklaruar se Kosova po përballet me një krizë të thellë ekonomike dhe sociale, derisa ka premtuar rritje pagash e pensionesh, ulje të tatimeve dhe investime të mëdha në sektorët kyç në vend.
Ai bëri këto komente e premtime me rastin e një vizite te familja Thaçi në Mitrovicë, që është pjesë e takimeve “derë më derë” me qytetarë, në kuadër të fushatës për zgjedhjet e 7 qershorit.
AI tha se çmimet e larta, pagat e vogla dhe mirëqenia e përkeqësuar janë bërë barrë për shumë familje kosovare.
Sipas Hamzës, Kosovës i duhet një drejtim i ri politik dhe ekonomik, i cili do të ndikojë drejtpërdrejt në përmirësimin e jetës së qytetarëve.
“Është jetike t’i jepet Kosovës një drejtim i ri politik dhe ekonomik, me rritje pagash e pensionesh, ulje të tatimeve, investime të mëdha në ekonomi, shëndetësi e arsim”, ka deklaruar Hamza, sipas një njoftimi të PDK-së.
Sipas kësaj kumtese, gjatë takimi me Hamzën, nikoqiri Besim Thaçi, që është profesor i teknologjisë, ka thënë se “gjendja ekonomike është rënduar viteve të fundit, pasi çmimet janë rritur vazhdimisht, ndërsa pagat kanë mbetur pothuajse të njëjta”.
Hamza është përgjigjur duke thënë se ai dhe PDK bëjnë thirrje për ndryshim, duke theksuar se qytetarët meritojnë më shumë mbështetje dhe zhvillim ekonomik.
“Prandaj është jetike t’i themi stop krizës dhe, bashkë, ta ndryshojmë Kosovën. Ky është misioni ynë. Ky është zotimi ynë”, ka deklaruar ai.
