Kandidati për kryeministër nga Partia Demokratike e Kosovës (PDK), Bedri Hamza, ka ritheksuar premtimin për rritje prej 50 për qind të pagave dhe pensioneve, duke iu kundërpërgjigjur kritikave të kryeministrit në detyrë dhe kandidatit nga Lëvizja Vetëvendosje, Albin Kurti, i cili ka vënë në dyshim realizueshmërinë e premtimeve elektorale të PDK-së, përfshirë uljen e tatimeve dhe rritjen e shpenzimeve publike.
Hamza ka deklaruar se programi i PDK-së mbështetet në përvojë konkrete qeverisëse dhe në politika që, sipas tij, kanë dhënë rezultate të prekshme në të kaluarën.
Ai ka përmendur vendimet e marra gjatë qeverisjes së PDK-së, duke theksuar uljen e tatimit në fitimin e korporatave dhe tatimit në të ardhurat individuale në vitin 2009.
“Kur mungon vizioni dhe guximi për vendimmarrje, atëherë mendohet se as të tjerët nuk munden t’i bëjnë këto gjëra. Ne jo vetëm që i kemi ditur, por edhe i kemi realizuar. Në janar të vitit 2009 i kemi ulur tatimet në fitimin e korporatave nga 20 në 10 për qind dhe tatimin në të ardhurat individuale nga 20 në 10 për qind për shkallën e lartë”, ka deklaruar Hamza.
Në një postim në rrjetet sociale, Hamza ka deklaruar se qeveria që ai synon të udhëheqë do të jetë partnere e bizneseve.
“Pa sektor privat të fortë nuk ka zhvillim të shtetit. Ne do t’i mbështesim bizneset të rriten, të investojnë dhe t’i rrisin pagat për punëtorët. Programi ynë parasheh tatim sipas fitimit real për qarkullim deri në 30 mijë euro dhe grante deri në 30 për qind për rritje, zhvillim dhe investime të reja,” ka shkruar Hamza.
Përveç rritjes së pagave, Hamza ka premtuar edhe rritje prej 50 për qind të pensioneve, duke e cilësuar këtë si një hap të domosdoshëm për përmirësimin e jetës së pensionistëve dhe forcimin e sigurisë sociale në vend.
