Partia Demokratike e Kosovës ka mbajtur sonte tubim zgjedhor në Skenderaj në të cilin u prezantuan edhe kandidatët për deputetë nga radhët e kësaj komune për zgjedhjet e 28 dhjetorit.
Kandidatët nga radhët e PDK-së për deputetë nga komuna e Skenderajt janë Sala Jashari, Jakup Nura, Ganimete Musliu, Blerta Deliu-Kodra, Përparim Gruda, Ariana Musliu-Shoshi, Xhevahir Geci, Ilir Murtezaj, Gëzim Qerimi, Shahin Dervishaj, Musli Gucati, Mërgim Lushtaku, Bekim Haxhiu dhe Abelard Tahiri.
Kryetari i PDK-së, njëherësh kandidat për kryeministër, Bedri Hamza, shpalosi zotimet kryesore si kryeministër i ardhshëm, si rritja e pagave, rritje të pensioneve, ulje të tatimit në pagë, ulje e TVSH-së për artikuj esencialë, heqje e TVSH-së për energji elektrike, formimin e fondit për bursa në arsim.
“Nuk ka si të filloj programi im, pa e nisur me kategorinë e dala nga lufta. Për të gjitha familjet e dëshmorëve rritje 50 për qind, 50 për qind rritje për invalidë të luftës dhe trajtim shëndetësor brenda dhe jashtë institucioneve të vendit. Ata dhanë gjithçka për Kosovën dhe ne do t’u qëndrojmë mbrapa. 50 për qind rritje për veteranët e luftës. Rritje pensioneve për të gjitha kategoritë e pensioneve 50 për qind. Te pensionet kontribut-dhënëse, rritje 50 për qind edhe për familjet me asistencë sociale. Ne kujdesemi edhe për fëmijët e pensionistëve edhe për fëmijët e veteranëve e dëshmorëve që sot kontribuojnë në rritjen e zhvillimit të Kosovës, rritje prej 50 për qind për paga 85 mijë njerëz që realizojnë paga përmes buxhetit të Kosovës. Për ne arsimi është perspektiva, ekonomia dhe e ardhmja e Kosovës. Do të krijojmë fondin për bursa 30 milionë euro në vit për bursa për studime. Çerdhe gjithandej Kosovës, shëndetësi me pacientin në qendër, sigurimet shëndetësore dhe mbi të gjitha personat e moshuar, me sëmundje kronike i sigurojmë se do të kenë furnizim me barna pa pagesë”, tha Hamza.
Kandidati për kryeministër Bedri Hamza tha se nën qeverisjen e tij do të punojë për anëtarësim të vendit në NATO, Këshillin e Evropës dhe shumë organizata tjera ndërkombëtare, njohje nga pesë vende anëtare të BE-së dhe anëtarësim në familjen e madhe evropiane.
Partia Demokratike e Kosovës në garën zgjedhore të 28 dhjetorit ka gjithsej 110 kandidatë dhe në fletëvotim mban numrin 130.
