Kandidati për kryeministër nga Partia Demokratike e Kosovës, Bedri Hamza, ka deklaruar se partia do ta hapë fushatën zgjedhore në Ferizaj në ora 20:00.
Në një konferencë për media, Hamza tha se PDK po hyn në fushatë me respekt për qytetarët dhe besim në demokraci, duke kërkuar një garë të barabartë dhe fer.
“Përdorimi i resurseve shtetërore dhe i parasë publike në funksion të zgjedhjeve dhe maksimalizimit të votës për partinë në pushtet nuk është gjë e duhur. Kjo nuk duhet të ndodhë”, ka deklaruar Hamza.
Ai prezantoi edhe pikat kryesore të programit qeveritar të PDK-së, duke theksuar uljen e tatimeve dhe çmimeve, si dhe rritjen e pagave.
Hamza premtoi rritje prej 50 për qind të pagave dhe pensioneve, duke e cilësuar si masë të përhershme dhe të qëndrueshme.
“Do të ketë rritje të pagave prej 50 për qind dhe kjo do të jetë e përhershme, jo vetëm në kohë fushatash”, tha ai.
Sipas tij, kjo rritje nënkupton edhe përfitime të konsiderueshme për punëtorët e sektorit publik gjatë vitit.
Ai shtoi se rritje prej 50 për qind do të ketë edhe për pensionet dhe përfitimet sociale për të gjitha kategoritë, përfshirë pensionistët, familjet e dëshmorëve, invalidët e luftës, veteranët, personat me aftësi të kufizuara dhe viktimat e dhunës seksuale gjatë luftës.
Hamza theksoi se asnjë kategori nuk do të detyrohet të zgjedhë mes përfitimeve dhe se për familjet e dëshmorëve nuk do të ketë pagesa më të ulëta se 250 euro.
