Kryetari i Komunës së Mitrovicës, Bedri Hamza, i ka hedhur poshtë deklarimet se i arrestuari i sotëm, zyrtar në Ministrinë e Industrisë, Ndërmarrësisë dhe Tregtisë, i cili dyshohet për keqpërdorime të blerjeve të rezervave shtetërore është dhëndri i tij.
Hamza thotë se personi me emrin Qëndrim Krasniqi, ka shpifur.
“Një person me emrin Qëndrim Krasniqi, publikisht ka deklaruar se ‘Irfan Lipovica, i arrestuar ditën e sotme, është dhëndër i Bedri Hamzës dhe se i njëjti është martuar me vajzën e vëllaut tim’. Kjo është një e pavërtetë e madhe dhe një shpifje shumë e ulët”, ka shkruar Hamza në Facebook.
Tutje, ai ka paralajmëruar se nëse Krasniqi nuk e tërheq deklaratën e tij ai do të paditet.
“Prandaj, nëse ky person nuk e tërheq deklaratën e pavërtetë të tij dhe për të njëjtën nuk kërkon falje në mënyrën e njëjtë siç ka shpifur, do ta padis, njejtë siç kam bërë edhe në raste të tjera ndaj personave të tillë”.
Mes tjerash, i pari i Mitrovicës tha se gjuhës së tillë shpifëse, fyese, mashtruese e propoganduese duhet t’i vije fundi.
“Për sqarim për opinionin, unë i kam dy vajza dhe nuk janë të martuara dhe kam vetëm një vëlla i cili e ka vetëm një vajzë që as nuk është e martuar e as nuk punon, është studente në vitin e tretë në fakultet. Gjuhës së tillë shpifëse, fyese, mashtruese e propoganduese duhet t’i vije fundi. Qëndrim, shihemi në gjykatë!”, ka shkruar Hamza.
Në rrjete sociale janë shpërndarë deklarata se i arrestuari i sotëm, Irfan Lipovic për keqpërdorime të blerjeve të rezervave shtetërore është dhëndri i kryetarit të Mitrovicës, Bedri Hamzës.
Gjatë ditës së sotme, organet e rendit në Kosovë me urdhrin e Prokurorisë Speciale kanë arrestuar drejtorin e departamentit të rezervave shtetërore, Hafiz Garën, drejtorin e departamentin për integrime evropiane, Irgan Lipovica, si dhe afaristin Ridvan Muharremin, nën dyshimet se kanë bërë keqpërdorime sa u përket blerjeve të rezervave shtetërore.
Sipas Prokurorisë Speciale, të arrestuarit dyshohen për veprat penale “keqpërdorim i detyrës zyrtare” dhe “dhënie e ndihmës në kryerjen e veprës penale të keqpërdorimit të detyrës zyrtare”. Tre të arrestuarve iu është caktuar edhe masa a mbajtjes për 48 orë./teve1.info/
