Lideri i PDK-së, Bedri Hamza, ka deklaruar se Justina Shiroka-Pula është një emër i pranueshëm për partinë e tij për postin e presidentes së Kosovës.
Në një konferencë për media, Hamza ka bërë të ditur se 22 deputetët e PDK-së do të marrin pjesë në seancën e Kuvendit, duke thënë se presin që fillimisht të votohet Projektligji për Dhomat e Specializuara dhe më pas të procedohet me zgjedhjen e presidentes.
“22 deputetët e PDK-së janë këtu. Orët e fundit s’është dashur të ndodhë kjo, por shumë më herët. Është dashur të ketë seriozitet në këtë çështje”, tha Hamza.
Ai ka theksuar se, ndonëse PDK-ja nuk ka zhvilluar bisedime me Shiroka-Pulën, kandidatura e saj është e pranueshme për këtë parti.
“Ne do të shkojmë në sallën e Kuvendit dhe presim të votohet ligji për Specialen. Sa i përket çështjes tjetër, edhe Kurti, edhe pse s’kemi biseduar me zonjën Shiroka-Pula, për PDK-në është emër i pranueshëm për presidente”, u shpreh Hamza.
Megjithatë, Hamza ka njoftuar se PDK-ja do të propozojë edhe një kandidate të saj për postin e presidentes. Bëhet fjalë për deputeten Eliza Hoxha.
“PDK-ja e propozon si kundërkandidate zonjën Eliza Hoxha. Ne po shkojmë në Kuvend, presim. Koha është e shkurtër. Jemi të interesuar ta kemi ligjin”, tha Hamza.
