Kryetari i Partia Demokratike e Kosovës, Bedri Hamza, ka deklaruar se për partinë e tij çështja e zgjedhjes së presidentit është tashmë e përmbyllur, duke e cilësuar ftesën për seancë të jashtëzakonshme si joserioze.
Sipas tij, një veprim i tillë ka për qëllim manipulimin dhe nuk prodhon rezultat konkret.
“Para pak çastesh pranuam edhe një ftesë për seancë të Kuvendit të Kosovës me një pikë të vetme – zgjedhjen e presidentit. Është një veprim joserioz, që synon manipulimin dhe nuk prodhon rezultat. Nëse vendi shkon në zgjedhje, përgjegjës është Albin Kurti”, ka deklaruar Hamza.
Ai theksoi se, pas diskutimeve në Këshillin Drejtues të PDK-së, kjo temë konsiderohet e mbyllur.
“Ne kemi ardhur në përfundim që kjo temë është e përmbyllur. I urojmë sukses në zgjedhjen e Presidentit me 98 deputetët tjerë të Kuvendit të Republikës së Kosovës”, tha ai.
Hamza shtoi se aktualisht ekzistojnë dy kandidatë të deklaruar, pavarësisht se, sipas tij, ishte thënë se nuk do të ketë kandidatë politikë.
“Deri tani kemi zyrtarisht dy kandidatë. Është deklaruar se nuk do të ketë kandidatë politikë, por të dy janë në fakt nga Lëvizja Vetëvendosje”, u shpreh ai.
I pyetur për mundësinë e rikandidimit të Vjosa Osmani, Hamza tha se ajo mund të zgjidhet presidente nëse propozohet, duke pasur votat e mjaftueshme.
“Nëse Lidhja Demokratike e Kosovës e propozon Vjosa Osmanin, ajo mund të zgjidhet me votat e Lëvizjes Vetëvendosje dhe LDK-së, ndoshta edhe të deputetëve të tjerë”, deklaroi ai.
Ai gjithashtu përsëriti gatishmërinë për të kontribuar në gjetjen e një zgjidhjeje, duke përmendur takimet që ka pasur me Kurtin, por sipas tij, kryeministri nuk ka ofruar asnjë alternativë konkrete për tejkalimin e situatës.
