Anëtari i Partisë Demokratike të Kosovës, Xhavit Haliti, e ka komentuar një koalicion të mundshëm me Lëvizjen Vetëvendosje për legjislaturën e re.
Në pyetjen sa a po heziton PDK që të bashkëqeverisje me Lëvizjen Vetëvendosje për shkak të një deklarate të dhënë nga kryetari i Skenderajt, Sami Lushtaku, i cili ka theksuar se në rast marrëveshje eventuale me VV-në, do të largohet nga PDK.
“Nuk e di kush kujt i’u ka kërcënuar. Disa mund të jenë qëndrime personale. Vendimet e partisë merren në organe. Nuk kam informata për kërcënime e largime. Ne kemi bërë program që t’i shërbejmë Kosovën dhe jo Sami Lushtakut. Nuk besoj se e ka shantazhuar ndokush. Edhe Lushtaku e di se nëse organet e partisë vendosin për koalicion, edhe ai e ka të drejtën e votës”, ka thënë Xhavit Haliti për emisionin “Mesditë” në Tëvë1.
Haliti që është një ndër figurat kryesore që nga themelimi i PDK-së, vlerëson se partitë në Kosovë nuk duhet që ta shohin njëra-tjetrën si armike.
“Partitë nuk duhet ta shohin njëra-tjetrën si armike. Ne konkurrojmë me programe për t’u shërbyer qytetarëve. Kësaj radhe qytetarët kanë votuar në këtë mënyrë. Askush nuk ka vendosur kufij që mos të krijohen institucionet. Ne kemi qëndrim publik që institucionet duhet të bëhen, kështu ka deklaruar edhe kryetari Bedri Hamza”, theksoi ai.
Tutje, Haliti ndër të tjera pohon se PDK-ja nuk do të bëhet patericë e kreut të Vetëvendosjes, Albin Kurti.
“Programi PDK-së dhe me statut, çështjet e mëdha duhet të kalojmë me vendim të këshillit drejtues të partisë. Nëse Albini mendon se ne duhet të bëhemi patericë e tij, konsideroj se nuk duhet të futemi në koalicion. Kur jemi të bashkëpunimet, duhet të ndahen punët dhe në fund të marrim përgjegjësi se kush sa ka kryer punë. Nëse futemi në koalicion, duhet që të përputhen programet”, tha ndër të tjera, Xhavit Haliti.
