Deputeti i PDK-së, Xhavit Haliti tha se vendi është duke u bombarduar nga propaganda e cila ka për qëllim që Kosovën ta fusë në aventura në raport me veriun.
Haliti, tha se nëse Kosova fillon me aventura me veriun atëherë inkuadrohet edhe Serbia me Rusinë.
“Ne jemi duke u bombarduar nga qendra të specializuara të propagandës, të cilat janë të interesuara që Kosovën ta fusin në aventura në raport me veriun, ku automatikisht po filluam aventura me veriun inkuadrohet edhe Serbia, inkuadrohet edhe Rusia në këtë problem, inkuadrohen ndoshta edhe të tjerët, por nuk është në rregull”, tha ai në emisionin “Këndi i Debatit” në Tëvë1.
Sipas Halitit, mediumet në Kosovë po bazohen në shkrime që i përgatit “kuzhina” serbe dhe ajo ruse.
“Disa mediume tona, ndoshta pa qëllim po bazohen në shkrime që kuzhina serbe i bën ose kuzhina ruse. P.sh., sot kishte një debat në Bundestag dhe këto grupet politike që janë ekstremiste, të ekstremit të majtë janë deklaruar që ne nuk duhet ta njohim Kosovën shtet të pavarur, sepse ajo është shtet mafioz. Ata i kanë bindjet e veta, ose paguhet dikush, krejt ata paguhen brenda një qendra që e kanë atë agjendë”, shtoi ish-nënkryetari i Kuvendit të Kosovës. /teve1.info/
