Kryetari i Komunës së Vitisë, Sokol Haliti ka thënë se kandidimi i tij për një mandat të katërt ka qenë kërkesë e qytetarëve të kësaj komune.
Sipas Halitit, vendimi për ta kandiduar ka ardhur për shkak të rezultateve të arritura dhe besueshmërisë që ai ka ndërtuar gjatë mandateve të tij.
“Nuk është personale kandidimi im për mandate të katërt, por është kërkesë e qytetarëve të Vitisë, e strukturave, e kryesisë, e forumeve dhe e mërgatës. Kjo për shkak të rezultateve që kemi pasur, për shkak të besueshmërisë që kanë, për shkak të projekteve, për shkak të progresit, për shkak të nxjerrjes së Vitisë përtej kufijve administrativ, për shkak të partneriteteve që kemi krijuar, për shkak të arritjeve, edhe për shkak të përmbushjes së programit qeverisës se ju e keni parë rezultatin GAP ku Vitia është në top komunat sa i përket realizimit të programit qeverisës. Unë natyrisht e kam pranuar votëbesimin e plotë për shkak se kam shumë projekte në vazhdimësi, shumë projekte të mëdha të cilat janë kruciale për Vitinë dhe jo vetëm”, është shprehur Haliti në emisionin “Ditari” në Tëvë1.
