Kandidati për kryetar komune nga radhët e Lëvizjes Vetëvendosje (LVV), Enver Haliti ka premtuar se do t’i ndërtojë një çerdhe rrethore japoneze dhe një tjetër të modeleve inovative ka premtuar në qytetin e Ferizajt.
Krahas tyre, Haliti është zotuar se në rast se del fitues në zgjedhjet lokale të 12 tetorit do të ndërtojë edhe shtatë çerdhe të tjera nëpër fshatrat e komunës.
Për çerdhen rrethore japoneze, ai gjatë fushatës elektorale të së mërkurës ka thënë se do të shtrihet në një sipërfaqe prej 3 mijë e 400 metrash katrorë dhe do të ketë kapacitet për të pranuar 294 fëmijë. Tek e ka shpalosur planin e objektit, Haliti ka thënë se në të do të ketë edhe oborr, si dhe rrugë të brendshme rrethore.
“Në katin e parë zhvillohen aktivitete edukative nëpër klasa, ku gjenden edhe dhomat e fjetjes, ordinanca, tualetet, gardëroba, administrata dhe dhoma e pritjes. Ndërsa në katin e dytë janë dhomat e lodrave, të shkencës, mini- parku botanik, dhomat e qëndrimit, të ushqimit, korridori me pamje nga oborri i brendshëm”, ka thënë ai.
Kjo çerdhe, Haliti ka thënë se do të ndërtohet te parku i çerdhes së vjetër në Ferizaj, ndërkaq të tjerat do të ngrihen për zona të fshatrave.
“Me programin tonë qeverisës, çerdhja model do të ndërtohet te parku i çerdhes së vjetër në rr. ‘Ramadan Rexhepi’. Krahas objektit të çerdhes që po ndërtohet afër Qendrës së Kompetencës me fondet e qeverisë, çerdhe të modeleve inovative do të ndërtojmë edhe në rrugën ‘Driton Islami’ në qytet, dhe 7 të tjera për zonat e fshatrave Neredime-Manastirc-Balaj, Pleshinë-Zaskok, Lloshkobare me fshatrat përreth, Nikadin-Varosh, Komogllavë-Fshat i Vjetër, Dardani-Zllatar-Mirosalë dhe Talinoc i Jerlive me fshatrat përreth”, ka theksuar Haliti në një videospot të publikuar në Facebook.
