Kandidati i Lëvizjes Vetëvendosje për kryetar të Komunës së Ferizajt, Enver Haliti, ka akuzuar kryetarin aktual, Agim Aliu për keqmenaxhim të fondeve publike dhe mungesë të vizionit urban.
Sipas Halitit, gjatë mandatit të Aliut, rreth 50 milionë euro janë investuar kryesisht në dy nënkalime në qendër të qytetit, të cilat i cilësoi si “dy gropa betoni që kundërmojnë erë kanalizimi”.
“Nëse ju e konsideroni dhe e quani zhvillim dhe transformim që diku 50 milionë euro të investohen gjatë dhjetë viteve në dy gropa betoni, në dy nënkalime në qendër të qytetit unë se di. Janë dy gropa betoni ku kundërmojnë era kanalizim për shkak se janë ndërtuar pa standarde, pa kritere e në kundërshtim me të gjitha dokumentet e planifikimit urban të Komunës së Ferizajt ”, ka thënë ai në emisionin “Këndi i Debatit” në Tëvë1.
Ai po ashtu ka theksuar se për njërin nga nënkalimet ekziston një raport i Auditorit të Përgjithshëm të Kosovës, ku janë identifikuar 11 shkelje të mëdha ligjore, përfshirë uzurpim prone të kompanisë Infrakos dhe ndërtim të lokaleve pa leje.
“Për njërin nënkalim, të parin, kemi edhe një raport të Auditorit të Përgjithshëm të Kosovës ku ka gjetur plot 11 shkelje të mëdha sa i përket ndërtimit të tij ku është në kontekst janë në gjykatë dhe po përballen me Infrakosin për shkak se iu ka uzurpuar prona Infrakosit, janë ndërtuar lokale aty pa lejen e tyre është dëmtuar infrastruktura nëntokësore”, ka thënë Haliti.
