Klubi i futbollit Prishtina ka njoftuar të mërkurën se Hakif Gashi është zgjedhur president i ri i klubit.
Gashi do ta zëvendësojë në këtë post Remzi Ejupin, i cili ishte për 18 vjet në krye të Prishtinës.
Gashi ka qenë prej kohësh aksionar i klubit kryeqytetas. Ai ushtron veprimtari në fushën e biznesit.
“Bordi i FC Prishtinës e ka mbajtur ditën e sotme mbledhjen e radhës, me këtë rast, kryetar i klubit është zgjedhur Hakif Gashi. Gashi tash e shumë vite është një nga aksionarët e klubit tonë. Anëtarë të Bordit të ri teknik janë Rrahman Haradini, Remzi Ejupi, Sinan Vllasaliu, Ismet Begolli, dhe Hakif Gashi”, thuhet në njoftim.
Prishtina ka pasur probleme të mëdha financiare sezonin e fundit dhe po kërkon këndelljen. Bardhekaltërit emëruan trajner Ismet Munishi pas përfundimit të sezonit të kaluar, ndërsa kanë finalizuar edhe disa transferime.
