Sulmuesi i njohur kroat, Nikola Kaliniq, i është bashkuar sërish Hajdukut të Splitit. Ai kishte vendosur të pauzonte për disa muaj dhe ka firmosur sërish me klubin e famshëm kroat të mërkurën. Kontrata e 35-vjeçarit është e vlefshme deri në fund të edicionit 2023/2024.
Ai ishte te Hajduku deri në fund të qershorit. Më pas kishte vendosur që për një periudhë të pushonte nga futbolli. Nuk ka luajtur prej atëherë dhe tani ka vendosur ta ndihmojë ekipin e zemrës. Hajduku do ta paguajë 1 euro në muaj.
“Pagën” prej 1 eurosh në muaj të Kaliniqit e ka konfirmuar drejtori sportiv i Hajdukut, Mindaugas Nikolicius.
“Sa u takon financave, ishte marrëveshja më e lehtë e arritur për tre vjet sa jam te Hajduku. Jemi marrë vesh për pagë prej 1 eurosh. Ai dëshiron t’i ndihmojë Hajdukut dhe ta fitojë titullin e kampionit dhe ky është motivi për të cilin u kthye”, ka thënë Nikolicius.
Hajduku të mërkurën nisi përgatitjet për pjesën e dytë të kampionatit. Te kjo skuadër janë edhe dy kosovarët, Emir Sahiti e Leon Dajaku.
Kaliniqi do ta mbajë fanellën me numër 9, të cilën ia ka liruar Aleksandar Trajkovski. Hajduku ka angazhuar edhe një lojtar tjetër, Laszlo Kleinheisler.
Kaliniqi ka 42 ndeshje e 15 gola për Kroacinë. Karrierën e ka nisur te Hajduku, ndërsa më pas luajti për Blackburn Rovers, Dnipro, Fiorentina, Milan, Atletico Madrid, Roma, Verna. Te Hajduku i Splitit, që ka shumë tifozë edhe në Kosovë, ishte kthyer në shkurt të vitit 2022.
Hajduku është në kërkim të titullit të kampionit, të cilin po e pret për kohë shumë të gjatë. Stinorin vjeshtor e ka përfunduar në pozitën e parë me 41 pikë. Rjeka është e dyta me 35 pikë, por me një ndeshje më pak të luajtur. Dy ndeshje më pak i ka Dinamo Zagrebi, që është e treta me 34 pikë. Këto tri skuadra pritet të zhvillojnë garë të fortë për titull të kampionit në pranverë.
