Guvernatori i Bankës Qendrore të Republikës së Kosovës (BQK), Ahmet Ismaili, ka marrë pjesë në CEF Forum 2026, i cili u mbajt në Shkup nën temën “Qeverisja në pasiguri dhe ndërtimi i institucioneve publike të qëndrueshme”.
Sipas komunikatës për media, forumi mblodhi politikëbërës të nivelit të lartë, drejtues të administratës publike, përfaqësues të bankave qendrore dhe ekspertë ndërkombëtarë, me qëllim diskutimin mbi lidershipin, qëndrueshmërinë institucionale dhe qeverisjen efektive në një mjedis gjithnjë e më kompleks dhe të pasigurt.
Para forumit, Guvernatori Ismaili ka marrë pjesë si vëzhgues në Takimin Vjetor të Bordit Drejtues të Qendrës së Ekselencës në Financa (CEF), ku u diskutuan prioritetet institucionale dhe forcimi i bashkëpunimit rajonal.
Në kuadër të forumit, ai ishte edhe panelist në sesionin “Qeverisja në pasiguri: zgjedhjet e lidershipit nën presion”, ku u trajtuan çështje si vendimmarrja në kohë krizash, koordinimi institucional dhe qëndrueshmëria e politikave publike.
Në fjalën e tij, Ismaili ka theksuar se pasiguria është bërë tipar i rëndësishëm i mjedisit të sotëm të politikëbërjes, duke kërkuar forcim të kapaciteteve institucionale për përballimin e sfidave ekonomike, financiare dhe gjeopolitike.
Ai ka nënvizuar rëndësinë e qeverisjes së mirë, ekspertizës profesionale, koordinimit efektiv dhe lidershipit strategjik si baza të qëndrueshmërisë institucionale, si dhe theksoi nevojën për komunikim transparent dhe vendimmarrje në kohë.
Po ashtu, ai vuri theksin te zhvillimi i kapaciteteve, programet e lidershipit dhe ushtrimet me skenarë krizash si mjete për rritjen e gatishmërisë institucionale.
