Ambasadori i Francës në Kosovë, Olivier Guerot, pas takimit me presidenten Vjosa Osmani, ka theksuar se temë diskutimi ka qenë situata politike dhe procesi zgjedhor.
Guerot ka theksuar rëndësinë që të gjitha partitë politike të kenë mundësinë të marrin pjesë në zgjedhjet e ardhshme, në mënyrë që procesi zgjedhor të jetë plotësisht gjithëpërfshirës dhe demokratik.
Ai ka vënë në pah edhe rolin e pazëvendësueshëm të mediave të lira për funksionimin e demokracisë, duke theksuar se gazetarët duhet të respektohen dhe, kur është e nevojshme, të mbrohen.
Ambasadori francez ka përsëritur pritshmërinë e Francës që zgjedhjet e 28 dhjetorit të rezultojnë me formimin e një qeverie të re, duke theksuar se Parisit i nevojitet një partner i plotë për të kontribuar në stabilitetin rajonal dhe forcimin e marrëdhënieve bilaterale.
Gjatë takimit, Guerot ka informuar presidenten Osmani për gatishmërinë e Francës që të mbështesë Kosovën në tranzicionin energjetik, përgatitjet për Lojërat Mesdhetare 2030, avancimin e anëtarësimit të plotë në Organizatën Ndërkombëtare të Frankofonisë, si dhe në zhvillimin e shkëmbimeve ekonomike ndërmjet dy vendeve.
“Gazetarët duhet të respektohen dhe, nëse është e nevojshme, të mbrohen”, shkroi ambasadori. /teve1.info/
Tranzicioni i rregullt i pushtetit në veri, Osmani thekson urgjencën e heqjes së masave
