Trajneri i Kosovës në volejboll, Lorik Ilazi të martën ka publikuar listën e lojtareve për grumbullimin e parë në kuadër të përgatitjeve për kualifikimet e Kampionatit Evropian.
Ilazi në listën e tij të zgjeruar ka përfshirë 26 volejbolliste që do të mblidhen të premten në Prishtinë për të nisur zyrtarisht përgatitjet për ndeshjet e rëndësishme që i presin në muajin gusht.
Në njoftimin e Federatës së Volejbollit të Kosovës (FVK), thuhet se Ilazi ka përpiluar listën bazuar në formën e lojtareve që kanë pasur këtë sezon në ekipet e Superligës së Kosovës dhe ato të Shqipërisë.
Në kuadër të kualifikimeve për Evropianin e vitit 2026, Kosova është në grup me Kroacinë dhe Rumaninë, kundërshtarë tejet të fortë. Kampanjën e kualifikimeve, volejbollistet e Kosovës e nisin në shtëpi kundër Kroacisë, ndeshje që do të luhet më 17 apo 18 gusht.
“Dardanët” janë në grup me Sllovakinë e Letoninë në këto kualifikime. Duelin e parë kualifikues e luajnë në shtëpi kundër Letonisë, po ashtu në muajin gusht.
