Mesfushori ofensiv, Brajan Gruda përfundimisht ia ka mbyllur derën Shqipërisë.
Gruda, i cili është pjesë e Brightonit, ka insistuar se dëshiron të luaj vetëm për Gjermaninë dhe këtë e ka bërë të ditur në një intervistë për kanalin zyrtar të federatës gjermane.
Gruda, aktualisht është grumbulluar me kombëtaren U21 të Gjermanisë, ndërsa ka shtuar se synimi i tij është që të paraqitet me ekipin A të këtij shteti në Botërorin e vitit 2026.
“Unë kam familjen në Shqipëri, prindërit e mi vijnë nga atje. Këtu kam lindur dhe rininë e kam kaluar në Gjermani. Nuk e di se çfarë ka e ardhmja, por zemra ime më thotë se dua të luaj për Gjermanin”, ka thënë ndër të tjera Gruda.
Para “Euro 2024” Gruda ishte grumbulluar me kombëtaren A të Gjermanisë, por ishte detyruar të largohej nga kampi stërvitor për shkak të lëndimit.
20-vjeçari ka qenë një dëshirë e madhe e selektorit Sylvinho, i cili dëshironte ta afronte me çdo kusht te Kombëtarja e Shqipërisë.
Këtë verë, Gruda u transferua te Brightoni nga skuadra e Mainzit për rreth 30 milionë euro.
