Sipas raportimeve të së shtunës, Milani po shqyrton gjithashtu mesfushorin e Bayer Leverkusenit dhe ish-lojtarin e Arsenalit, Granit Xhaka, si një alternativë ndaj Adrien Rabiot në afatin kalimtar të verës.
Rossonerët janë në kërkim të përforcimeve në mesfushë për sezonin 2025/2026 dhe janë përfolur për një transferim të ish-mesfushorit të Juventusit, Rabiot, i cili njihet mirë nga trajneri i ri i Milanit, Massimiliano Allegri.
Megjithatë, sipas raportimeve të Gazzetta dello Sport, një tjetër emër ndodhet në krye të listës së dëshirave të Milanit për mesfushën këtë verë: ai është Granit Xhaka i Leverkusenit.
32-vjeçari ka ende kohë në kontratën e tij aktuale në Bundesliga, e cila skadon në verën e vitit 2028.
Sidoqoftë, duke marrë parasysh moshën e lojtarit dhe faktin se Leverkusen pritet të kalojë një ndryshim të madh pas largimeve të trajnerit Xabi Alonso dhe mbrojtësit të krahut, Jeremie Frimpong, Xhaka mund të lejohet të largohet nëse vjen një ofertë e përshtatshme.
Sipas Gazzetta dello Sport, një ofertë rreth 15 milionë euro mund të mjaftojë për ta bindur Leverkusenin që të shesë, dhe në total marrëveshja nuk pritet të shkojë përtej 20 milionë eurove.
Gjithashtu, paga e lojtarit përshkruhet si “e përballueshme”, në nivelin e 2 deri në 2.5 milionë euro në sezon.
