Një grabitje e armatosur ka ndodhur në mesditën e së martës në një institucion mikrofinanciar në rrugën “Enver Maloku” në Prishtinë.
Lajmi është konfirmuar nga zëdhënësja e Policisë për rajonin e Prishtinës, Flora Ahmeti.
Ajo ka thënë për teve1.info se njësitet përkatëse kanë dalë menjëherë në vendin e ngjarjes dhe se kanë arrestuar njërin nga të dyshuarit dhe janë në kërkim të personit të dytë.
“Sot rreth orës 12:30 është raportuar për një grabitje të ndodhur në një institucion mikrofinanciar në rrugën “Enver Maloku”në Prishtinë. Reagimi i shpejtë i zyrtarëve nga Njësiti i Hetimeve të Përgjithshme, që operon në kuadër të Drejtorisë Rajonale të Policisë në Prishtinë, ka rezultuar me arrestimin e njërit prej personave të dyshuar vetëm pak minuta pas raportimit të rastit. Personi i dyshuar aktualisht po intervistohet, përderisa hetuesit janë në kërkim të personit të dytë, të cilin tashmë e kanë identifikua”, ka thënë Ahmeti.
Ajo ka bërë të ditur se personat e njëjtë dyshohet se kanë qenë të përfshirë në grabitjen e armatosur që ndodhi më 17 janar 2025, në rrugën “Agim Ramadani”në Prishtinë.
