Një grabitje e armatosur ka ndodhur të enjten në mëngjes në fshatin Duhël të Suharekës, afër daljes së autostradës “Ibrahim Rugova”.
Sipas Policisë së Kosovës, persona të armatosur kanë sulmuar një automjet të një kompanie poste private dhe kanë marrë disa zarfa që dyshohet se përmbanin para.
Zëdhënësi i Policisë për rajonin e Prizrenit, Shaqir Bytyqi, ka konfirmuar rastin:
“Sot, më datë 24.10.2025, rreth orës 07:45, një person mashkull, 44-vjeçar, ka raportuar në polici se derisa ishte duke drejtuar një automjet tip kombi, postë private, në dalje të autostradës në fshatin Duhël, është ndaluar dhe sulmuar nga persona të panjohur. Të dyshuarit, nën kërcënim dhe me forcë, i kanë marrë disa zarfa të mbyllur që dyshohet se përmbanin para.”
Bytyqi ka bërë të ditur se viktima nuk ka pësuar lëndime dhe nuk di shumën e saktë të parave të grabitura, pasi zarfa ishin të mbyllura.
“Policia ka reaguar menjëherë dhe është duke u marrë intensivisht me rastin. Deri më tani dyshohet se ishin disa persona dhe ishin të armatosur. Ata janë larguar nga vendi i ngjarjes me një automjet të tipit Golf. Hetimet janë në zhvillim me qëllim të identifikimit dhe arrestimit të të dyshuarve,” ka shtuar Bytyqi.
Policia ka apeluar tek qytetarët për çdo informacion që mund të ndihmojë në zbardhjen e rastit.
