Google do të ndryshojë emrin e Gjirit të Meksikës në Gjirin e Amerikës në aplikacionin e saj Google Maps, ka thënë kompania, pasi Presidenti i SHBA Donald Trump urdhëroi që të riemërohej në dokumentet e qeverisë amerikane.
Ndër veprimet e shumta ekzekutive që Trump nënshkroi në javën e tij të parë në detyrë ishte edhe një për rititullimin e Gjirit të Meksikës në hartat zyrtare të ShBA-së dhe komunikimet federale.
Ndryshimi i emrit do të shfaqet vetëm për përdoruesit e Google Maps në ShBA.
Google tha gjithashtu se përdoruesit e tij të aplikacionit amerikan do të shihnin malin më të lartë të Amerikës së Veriut, malin Denali, të rikthehet në emrin e tij të mëparshëm të malit McKinley, pasi një gjë e tillë u kërkua nga Trump poashtu.
“Ne kemi marrë disa pyetje në lidhje me emërtimin brenda Google Maps,” tha kompania në një postim në mediat sociale të hënën. “Ne kemi një praktikë të gjatë të aplikimit të ndryshimeve të emrave kur ato janë përditësuar në burimet zyrtare të qeverisë.”
Google tha se ndryshimet – si për Gjirin e Meksikës ashtu edhe për malin Denali – do të bëhen “shpejt” pasi të përditësohet Sistemi i Informacionit të Emrave Gjeografikë (GNIS), raporton BBC.
“Kur emrat zyrtarë ndryshojnë midis vendeve, përdoruesit e Maps shohin emrin e tyre zyrtar lokal,” tha kompania. “Të gjithë në pjesën tjetër të botës i shohin të dy emrat. Kjo vlen edhe këtu.”
Ndryshimi i emrit duket të jetë me prioritet të lartë për Trump, pasi ai e përmendi atë edhe në fjalimin e tij inaugurues më 20 janar – vetëm pak minuta pasi bëri betimin e detyrës.
Ndërkohë, presidentja e Meksikës, Claudia Sheinbaum u tall me vendimin e riemërtimit të Trump dhe madje fillimisht sugjeroi me sarkazëm riemërimin e Amerikës së Veriut si “América Mexicana” ose “Amerika Meksikane”.
