Gjykata Themelore në Pejë ka caktuar masën e paraburgimit në kohëzgjatje prej një muaji ndaj T.P., 54 vjeç, i cili po dyshohet për kryerjen e veprës penale “Dhunimi”.
Sipas autoriteteve gjyqësore, i dyshuari akuzohet se ka dhunuar seksualisht një vajzë 13-vjeçare në një fshat të komunës së Istogut. Ngjarja ka shkaktuar reagime të shumta, ndërsa organet e drejtësisë kanë ndërmarrë veprimet e nevojshme ligjore.
Në njoftimin zyrtar të Gjykatës bëhet e ditur se paraburgimi i të dyshuarit do të zgjasë deri më 28 shkurt, me qëllim të zhvillimit të papenguar të procedurës penale.
“Masa e paraburgimit është caktuar për shkak të dyshimit të bazuar se i pandehuri ka kryer veprën penale ‘Dhunimi’, sipas nenit 227, paragrafi 7 lidhur me paragrafin 1, si dhe nenit 77 të Kodit Penal të Republikës së Kosovës”, thuhet në vendim.
Gjykata thekson se masa është vendosur në përputhje me kushtet ligjore të parapara në Kodin e Procedurës Penale të Republikës së Kosovës.
