Nënkryetari i Kuvendit të Republikës së Kosovës, Ardian Gola, po merr pjesë në sesionin e Asamblesë Parlamentare të Këshillit të Evropës (APKE), i cili po zhvillohet në Strasburg nga 22 deri më 26 qershor 2026.
Sipas njoftimit zyrtar, gjatë këtij sesioni deputetët e APKE-së do të diskutojnë dhe shqyrtojnë një sërë çështjesh që lidhen me demokracinë, të drejtat e njeriut dhe sundimin e ligjit në Evropë dhe më gjerë.
Gjatë qëndrimit të tij në Strasburg, nënkryetari Gola do të marrë pjesë në seancat plenare të Asamblesë, në mbledhjet e Grupit Socialist (SOC), si dhe në takimet e komiteteve përkatëse të APKE-së.
Ai gjithashtu pritet të kontribuojë në debatet parlamentare mbi temat në agjendë dhe të ketë mundësinë t’u drejtojë pyetje personaliteteve ndërkombëtare që do t’i drejtohen Asamblesë.
Në margjinat e sesionit, Gola do të zhvillojë takime me deputetë dhe përfaqësues të institucioneve dhe organizatave ndërkombëtare.
Po ashtu, ai është i ftuar të marrë pjesë në pritjen zyrtare të organizuar nga Sekretari i Përgjithshëm i Këshillit të Evropës, Alain Berset, në nder të sesionit të APKE-së./teve1.info/
