Kandidati për kryetar të Komunës së Gjakovës nga radhët e Lëvizjes Vetëvendosje, Ardian Gola, ka dërguar një ftesë të hapur dhe publike për bashkëpunim drejt ndryshimit të qeverisjes lokale, drejtuar degës së Lidhjes Demokratike të Kosovës në Gjakovë dhe kryetarit të saj, Shefqet Shehu.
Në letrën e tij, Gola thekson se situata aktuale në komunë ka krijuar një sistem të ngurtë që për vite të tëra ndan privilegje në vend të mundësive, duke pamundësuar frymën e meritokracisë dhe lidhjen me qytetarët.
“Koha po dëshmon se qeverisja në Gjakovë është shndërruar në sistem të ngurtë që për vite të tëra ndan privilegje në vend të mundësive, duke iu shërbyer interesave të ngushta konjukturale,” shkruan Gola në letrën e tij.
Gola thekson se ndryshimi i qeverisjes në Gjakovë është një imperativ qytetar e politik, duke nënvizuar se qyteti ka nevojë për rotacion dhe frymë të re, larg marrëveshjeve të vjetra dhe strukturave të rrënjosura që kanë penguar zhvillimin lokal.
“Ftesa jonë drejtuar juve, si degë e LDK-së në Gjakovë, është për një bashkëpunim të sinqertë dhe parimor, që buron nga interesi i të gjithë qytetarëve të komunës e jo nga hakmarrjet politike ose ndarjet partiake,” shton Gola.
Ai propozon që të dyja partitë të ndërmarrin një bashkëpunim konkret me ekipet e tyre të profesionistëve, me synim kthimin e qeverisjes në shërbim të qytetarëve dhe krijimin e një koalicioni që reflekton interesat jetikë të Gjakovës, jo agjendat qendrore politike.
“Le ta bëjmë këtë hap si dy forca që ndahen në shumëçka, por bashkohen në një gjë thelbësore: kthimin e Gjakovës në duart e qytetarëve të saj,” përfundon kandidati i Vetëvendosjes.
