Kandidati i Lëvizjes Vetëvendosje për kryetar të Gjakovës, Ardian Gola, ka premtuar ndërtimin e një Muzeu të Luftës në këtë komunë.
Në emisionin “Këndi i Debatit” në Tëvë1, Gola ka theksuar se lokacioni i këtij muzeu do të vendoset në bashkëpunim me qytetarët e Gjakovës.
Sipas tij, Muzeu i Luftës, përveçse do të ketë rolin e dokumentimit historik, do të shërbejë edhe si një formë e re e diplomacisë kulturore.
“Nëse ka diçka që më pëlqen në programin për kulturën, është Muzeu i Luftës. Ka një ide fillestare, por pastaj kjo do të zhvillohet përmes dëgjimeve publike, do t’i thërrasim qytetarët dhe do të vendosim së bashku për lokacionin e tij. Përkundër faktit që ekziston si ide, është shumë e vonuar, sepse po flasim për një komunë që është prekur jashtëzakonisht shumë në njerëz dhe në dëme materiale, dhe megjithatë nuk kemi asnjë dokumentim muzeal të historisë sonë të vonshme. Ky muze, përveç funksionit të dokumentimit historik, do të ketë edhe potencial turistik dhe si i tillë, jo vetëm që do të ofrojë mundësi të reja biznesore, por do të shërbejë shumë edhe për një lloj diplomacie të re kulturore. Ironia e fatit është se dëgjova që edhe në Ruandë ka dokumentime për gjenocidin në Bosnjë dhe në Kosovë, ndërsa ne ende nuk e kemi një muze të tillë,” ka deklaruar Gola.
Gola ka shtuar se ky nuk është projekti i vetëm në fushën e kulturës, pasi kanë edhe projekte të tjera, si Muzeu i Fotografisë, mbështetja e festivaleve ekzistuese dhe krijimi i grupeve të vogla teatrore.
