Afër fundit është gjyqi i ish eprorit të UÇK-së, Pjetër Shala, i akuzuar për krime lufte. Në fjalën përfundimtare, mbrojtja e tij kërkoi të shpallet i pafajshëm. Ndërkohë që mbrojtja e tetë viktimave pjesëmarrëse në proces, kërkoi dënimin e Shalës.
Radhën për t’i dhënë fjalët përfundimtare e pati mbrojtja e viktimave.
Në procesin e Pjetër Shalës, kanë marrë pjesë tetë viktima.
E mbrojtja e tyre kërkoi dënimin e Shalës.
“Në mënyra individuale, ata janë dëmtuar nga ajo se çfarë ka ndodhur në Kukës dhe dëshira e tyre mbi të gjitha është që ata të shohin që drejtësia të vendoset në vend. Në këtë çështje, kjo do të thotë se i akuzuari duhet të dënohet, të cilin ata e njohin shumë mirë, pasi ai është njëri prej personave që është përgjegjës për dëmin e shkaktuar ndaj tyre”, tha Simon Laws.
Madje, u tha se viktimat pjesëmarrëse në gjyq, nuk janë personat e vetëm që kanë pësuar nga krimet e pretenduara në fabrikën e metalit në Kukës.
“Disa prej të ndaluarve në Kukës kanë vdekur përpara se kjo gjykatë kishte mundësi t’iu ofronte një mundësi për gjykimin e Pjetër Shalës, megjithatë zërat e tyre janë dëgjuar në formën e dëshmive që ata kanë lënë pas tyre. Fatmirësisht, të tjerët janë ende gjallë”, është shprehur Laws.
Të martën fjalët përfundimtare i nisi edhe ekipi mbrojtës i Pjetër Shalës.
Ata ngritën si shqetësim devijimin e drejtësisë nga deklaratat e dëshmitarëve.
“Kjo çështje gjyqësore në Hagë është çështje e dhimbshme, e parehatshme ku nuk do të donim të ishim pjesë sepse disa nga viktimat nuk e thanë të vërtetën. Disa viktima bën gabime. Është e qartë z. Gjykatës që kemi një rrezik këtu që po devijojmë rrugën e drejtësisë, sa i takon zbulimit të vërtetës sepse janë bërë gabime dhe janë keqpërdorur qëllimisht dëshmi nën betim”, ka deklaruar Mohamed Hédi Aouini – avokat i Mustafës.
Seanca do të vazhdojë edhe të mërkurën, ku pritet të përfundojë gjyqi i dytë për krime lufte nga Gjykata Speciale në Hagë.
