Ka vazhduar gjyqi në rastin e njohur si “53 milionëshi”.
Në rigjykimin ndaj Pal Lekaj, Nebih Shatri, Eset Berisha dhe Besim Tahiri, ka filluar dëgjimi i dëshmitarëve të parë.
Ish drejtori i departamentit për Infrastrukturë në Ministrinë e Infrastrukturës, Ramë Qupeva, dëshmoi për vazhdimin e kontratës ndaj BechtelEnkas, që shtetit të Kosovës i kushtoi 53 milionë euro.
Sipas Qupevës, rregulla ndërkombëtare në fushën e infrastrukturës lejojnë vazhdimin e kontratave edhe pa përcaktim të kostos financiare.
“Në këtë vazhdim, nuk është paraparë, nuk është paraqit kostoja financiare. Sipas rregullave të FIDIC-ut, vazhdimi i kontratave mund të bëhet në dy mënyra. Mënyra e parë është me përcaktimin e kostos financiare, kur janë afatet e shkurtëra kohore për vazhdimin e punimeve. Dhe mënyra e dytë është pa një shumë të caktuar, e cila definohet deri në kohën kur lëshohet certifikiata e pranim-dorëzimit të punimeve”, tha Qupeva.
Kërkesë nga konsorciumi Bechtel Enka për shtyerjen e punimeve në autostradën “Arbër Xhaferi” për nëntë muaj, sipas dëshmitarit ka pasur edhe në kohën e ministrit të infrastrukturës Lutfi Zharku dhe në kohën e ministrit Pal Lekaj.
Mirëpo, këto kërkesa dëshmitari thotë se kanë dalluar në shumën e kërkesës financiare.
“Kërkesa financiare nuk ka qenë e njëjtë. Kërkesa e parë financiare ka qenë 14.7 milionë euro. Kurse kërkesa e dytë, e miratuar ka qenë 53 milionë”, u shpreh dëshmitari.
E gjithë problematika në këtë mes, sipas dëshmitarit ka qenë mungesa e alokimeve të buxhetit nga ana e Qeverisë qysh në krye të herës.
“Sipas alokimeve buxhetore nga viti 2015 dhe viti 2016, Qeveria e Republikës së Kosovës nuk i ka alokuar mjetet e nevojshme për realizimin e këtij projekti”, tha Qupeva.
Gjyqi ndaj Lekaj, Shatrit, Berishës e Tahirit, të akuzuar për korrupsion, do të vazhdojë me dëgjimin e dëshmitarëve të tjerë.
Të njëjtit sipas vendimit të parë të Gjykatës Themelore në Prishtinë, ishin shpallur fajtor dhe dënuar me 10 vite e 3 muaj burgim, por që ky vendim i Themelores u rrëzua nga shkalla e dytë e gjyqësorit.
