I tëri procesi gjyqësor ndaj katër të akuzuarve për keqpërdorim me rezerva shtetërore, ministres në detyrë të Tregtisë, Rozeta Hajdari, ish zyrtarëve të MINT, Hafiz Gara dhe Irfan Lipovica, si dhe afaristit Ridvan Muharremi, do të zhvillohet me dyer të mbyllura.
Këtë vendim mori Gjykata Themelore në Prishtinë, nën arsyetimin se pjesë e akuzës janë informacionet konfidenciale dhe sekrete shtetërore.
Mirëpo, kjo mbyllje e tërësishme e gjyqit për rezerva shtetërore nuk po mirëpritet nga njohës të drejtësisë.
“Kodi i Procedurës Penale lejon mbylljen e pjesshme dhe të tërësishme të seancës. Në rastin konkret vlerësoj se ka qenë e mjaftueshme mbyllja e pjesshme për faktin se do të mund të mbaheshin seancat e mbyllura vetëm në çështjet kur diskutohet përkitazi me çështjet vërtet janë objekt ose çështje sekreti. E të tilla ligji për rezerva shtetërore i përcakton tri elemente, plani strategjik për rezerva, plani vjetor dhe vendndodhja, në rast se eventualisht do të mund të ishin objekt i akuzës, por me aq sa kemi parë nuk janë”, deklaroi avoakti Ardian Bajraktari.
Parimi i publicitetit, sidomos në këtë rast ku aktakuza ndërlidhet me dëmtim të buxhetit të shtetit, sipas avokatit Xhevdet Smakiqi, do duhej të garantohej nga gjyqësori.
“Pothuajse i gjithë gjykimi të jetë publik, për arsye se kemi të bëjmë me dëmtimin apo palën e dëmtuar që në këtë rast është Qeveria e Republikës së Kosovës, buxheti i Republikës së Kosovës dhe taksat e qytetarëve. Unë jam kundër që të mbahet i gjithë procesi në mënyrë të mbyllur, pa publikun derisa nëse ka ndonjë dokument i cili nuk duhet t’i nënshtrohet për shkak të sekreteve shtetërore, për shkak se ka dispozita në ligjin për rezerva shtetërore se cilat elemente janë sekret shtetëror, mandej aty duhet të kemi edhe certifikatën e organeve të sigurisë. Në këtë rast edhe mund të mbyllet, por konsideroj se mbyllja e procesit nuk është në pajtim me parimin e publicitetit dhe i cili duhet të ndjeket”, thotë avokati Xhevdet Smakiqi.
Në fillim të kësaj jave u mbajt shqyrtimi fillestar në këtë çështje, ku edhe u mor vendimi për mbyllje të tij, pas kërkesës së mbrojtjes së dy të akuzuarve, Hajdari dhe Lipovica.
