Gjykata Supreme e Kosovës ka aprovuar si të themeltë kërkesëpadinë e Institutit Demokratik të Kosovës (KDI) të paraqitur kundër Qeverisë së Kosovës, duke shpallur të paligjshëm dhe duke shfuqizuar nenin 6, paragrafi 6 të Rregullores (QRK) nr. 06/2023 për Kompensimin për Udhëtime Zyrtare dhe Shpenzime të Përfaqësimit.
Sipas aktgjykimit, KDI kishte parashtruar padi për shfuqizimin e pjesshëm të këtij akti nënligjor, duke argumentuar se dispozita e kontestuar bie ndesh me Ligjin nr. 08/L-196 për Pagat në Sektorin Publik.
Padia erdhi pas një ankese që KDI kishte pranuar në muajin korrik 2025 nga një grup ushtarësh të Forcës së Sigurisë së Kosovës, të cilët kishin raportuar shkelje të ligjit lidhur me kompensimin e udhëtimeve zyrtare.
Gjykata Supreme vlerësoi se neni i kontestuar, i cili përcakton se shpenzimet e udhëtimit zyrtar nuk mbulohen për periudha më të gjata se një muaj, nuk ka bazë ligjore.
Sipas gjykatës, një kufizim i tillë nuk parashihet në Ligjin për Pagat në Sektorin Publik, i cili garanton të drejtën e zyrtarëve publikë për kompensim të shpenzimeve të udhëtimit zyrtar pa asnjë kufizim kohor.
Në aktgjykim theksohet se Qeveria është e autorizuar vetëm të rregullojë mënyrën, kushtet dhe procedurat e kompensimit, por jo të kufizojë vetë të drejtën për kompensim të garantuar me ligj.
Gjykata ka vlerësuar se kufizimi njëmujor nuk përbën thjesht një rregull teknik, por cenon thelbin e së drejtës ligjore dhe përbën tejkalim të kompetencave të Qeverisë, duke e bërë kështu dispozitën të paligjshme.
