Gjykata Speciale ka refuzuar sot mocionin e paraqitur nga mbrojtja e Hashim Thaçit, Kadri Veselit, Rexhep Selimit dhe Jakup Krasniqit, i cili synonte rrëzimin e disa pikave të aktakuzës ndaj tyre.
Kryetari i trupit gjykues, Charles Smith, tha se trupi gjykues nuk është bindur nga argumentet e mbrojtjes për rrëzimin e akuzave.
“Trupi gjykues vëren se as ligji dhe as rregullorja nuk përmendin pikat, por akuzat, megjithëse Prokuroria ka përmendur pikat. Rregulli 130 lejon mbrojtjes të kërkojë që trupi gjykues të rrëzojë çdo, disa, ose disa pika të aktakuzës. Sa i takon thelbit të kundërshtimit, trupi gjykues vëren se incidentet dhe akuzat në kohën e caktuar, nuk janë akuza, ato janë fakte materiale që kanë të bëjnë me akuza. Ajo që kundërshton mbrojtja nuk është akuzë, por pjesë e akuzës në formën e materialeve, fakteve. Mbrojtja parashtron se ka autoritet lidhur me intereptimin dhe pikat ku sipas mbrojtjes, akuzat të para në raport me të gjitha pikat janë rrëzuar nga trupet gjykuese, megjithatë dëshiroj të theksoj se ato janë vendime në versionin e vjetër”, deklaroi ai.
Smith sqaroi se heqja e periudhës para fundit të majit 1998 dhe pas 20 qershorit 1999 do ta fragmentonte rastin. Sipas tij, rregullat gjyqësore lejojnë kundërshtimin e aktakuzës në tërësi dhe jo në pika të veçanta, siç kishte vepruar mbrojtja.
“Bazuar në atë më sipër trupi gjykues nuk është bindur se ai ka autoritet për të rrëzuar pjesë të akuzave, ose materialeve pjesë të aktakuzës. Mbi këtë bazë trupi gjykues rrëzon mocionin në tërësinë e vetë, nuk shkon në themelësinë e argumenteve për periudhën sa i takon konfliktit të armatosur”, tha ai.
Thaçi, Veseli, Selimi dhe Krasniqi ndodhen në paraburgim në Hagë që nga nëntori i vitit 2020 dhe po përballen me akuza për krime lufte dhe krime kundër njerëzimit.
