Gjykata Speciale u krijua mbi bazën e një marrëveshje ndërkombëtare të miratuar në Kuvendin e Kosovës para 7 viteve. Por dy institucionet e saj, Dhomat e Specializuara dhe Zyra e Prokurorit të Specializuar financohen nga Bashkimi Evropian.
Në një përgjigje të kësaj Gjykate për TëVë1 thuhet që nga BE Gjykata Speciale për një vit mori fonde në vlerë prej 42 milionë e 900 mijë euro.
E përpos BE-së, në buxhetin e Speciales kontribuojnë edhe disa shtete tjera. Për periudhën e njëjtë kohore, nga Qeveria Zvicerane, Gjykata pranoi para në vlerë prej afro 150 mijë euro, të cilat i ka shfrytëzuar për aktivitete informuese në Kosovë.
Mirëpo përfaqësues të organeve në këtë Gjykate, nuk dhanë hollësi se si janë shpenzuar këto mjete.
Ndërsa për periudhën 2018-2020, Gjykata e Kosovës në Hagë, kishte buxhet ne vlerë prej 86 milionë euro. Në këtë interval kohor, Qeveria Zvicerane i kishte dhënë Speciales grant mbi 181 mijë euro për aktivitete të saj në Kosovë. Kurse Qeveria Norvegjeze mbështeti zhvendosjen e gjykatës në Hagë me 80 milionë korona norvegjeze.
Marrë si tërësi, që nga viti 2016 kur Specialja filloi me punë, e deri vitin e kaluar, shpenzimet e saj tejkalojnë shifrën prej 173 milionë euro. /teve1.info/
Raporti i gazetares Florijeta Dernjani.
