Gjykata Kushtetuese e Maqedonisë së Veriut ka reaguar pas deklaratave të ish-presidentit maqedonas, Stevo Pendarovski, në lidhje me Ligjin për përdorimin e gjuhëve në Maqedoninë e Veriut, të cilat u transmetuan në emisionin “Këndi i Debatit” në Tevë1 më 13 mars 2026.
Pendarovski foli për statusin e gjuhës shqipe dhe sfidat në zbatimin praktik të saj, duke përmendur një iniciativë të paraqitur në Gjykatën Kushtetuese që sipas tij kërkonte shfuqizimin e ligjit. Ai tha.
“Është gjuhë zyrtare për shkak të 20 përqind të popullsisë. Ligji kryesor është në fuqi, ndërsa ai për përdorimin e shqipes është ndryshuar disa herë për të përmirësuar të drejtat e shqiptarëve. Ndërkohë, dikush, gjoja një qytetar i panjohur, ka paraqitur një kërkesë për të shfuqizuar ligjin… Problemi kryesor mbetet zbatimi praktik, veçanërisht në institucione dhe gjykata. Në shumë raste nuk e shohim zbatimin e plotë në jetën e përditshme, dhe nëse ligji ekziston vetëm për propagandë politike, atëherë nuk shërben për qytetarët”, deklaroi Pendarovski.
Në reagim, Gjykata Kushtetuese thekson se informacionet e dhëna nga ish-presidenti nuk korrespondojnë me gjendjen faktike.
“Nuk bëhet fjalë për një qytetar të panjohur, por për 13 iniciativa të paraqitura nga 45 paraqitës, përfshirë parti politike, profesorë, avokatë, shoqata dhe qytetarë. Është veçanërisht e rëndësishme që figurat publike të përmbahen nga informacioni i pasaktë ose i paverifikuar, pasi paragjykimi mund të ndikojë në reputacionin e Gjykatës dhe integritetin institucional. Gjykata nuk ka marrë asnjë vendim në këtë rast”, thuhet në reagim.
LAJMI:
A është shqipja gjuhë zyrtare në Maqedoninë e Veriut? – e sqaron ish-presidenti Pendarovski
