Gjykata e Drejtësisë së Bashkimit Evropian ka lënë në fuqi gjobën rekord prej 4,1 miliardë eurosh ndaj kompanisë Alphabet (Google), për abuzim me pozitën dominuese në tregun e pajisjeve mobile me sistemin operativ Android.
Vendimi i gjyqtarëve në Luksemburg rrëzon ankesën e Google dhe kompanisë mëmë Alphabet, duke konfirmuar kështu vendimin e mëparshëm të Gjykatës së BE-së, e cila në vitin 2022 kishte ulur gjobën nga 4,34 miliardë në 4,125 miliardë euro.
Sipas Gjykatës së Drejtësisë së BE-së, Google ka shkelur rregullat e konkurrencës duke përdorur pozicionin e saj dominues në treg.
Rasti daton në vitin 2018 dhe lidhet me kushtet që Google u ka vendosur prodhuesve të telefonave Android.
Komisioni Evropian kishte konstatuar se kompania kishte abuzuar me fuqinë e saj në treg, duke kërkuar që në pajisjet Android të parainstaloheshin Google Search dhe shfletuesi Chrome, si dhe duke vendosur kushte licencimi që favorizonin shërbimet e saj.
Në këtë mënyrë, sipas Komisionit, Google forconte artificialisht pozicionin e motorit të saj të kërkimit dhe kufizonte konkurrencën.
Google e apeloi vendimin, por Gjykata e BE-së e rrëzoi, duke e konsideruar sjelljen e kompanisë si praktikë antikonkurruese në ekosistemin Android.
Një zëdhënës i kompanisë tha për Reuters se vendimi nuk merr parasysh investimet e bëra për ta mbajtur Android-in të hapur dhe falas.
Megjithatë, kompania theksoi se ka përshtatur marrëveshjet e saj për t’u përputhur me vendimin fillestar të vitit 2018.
Google është shprehur se mbetet e fokusuar në inovacion dhe bashkëpunim me partnerët dhe zhvilluesit.
Në total, gjatë viteve të fundit, Google ka marrë gjoba nga BE-ja për shkelje të rregullave të konkurrencës që arrijnë në rreth 11 miliardë euro.
Gjykata theksoi se instalimi paraprak i aplikacioneve krijonte një avantazh të padrejtë për Google, duke ndikuar në zgjedhjet e përdoruesve dhe duke kufizuar konkurrencën.
Sipas vendimit, nuk ishte e nevojshme të provohej se konkurrentët ishin po aq efikasë, pasi vetë praktikat e Google mjaftonin për të kufizuar tregun dhe për të forcuar barrierat e hyrjes për kompani të tjera.
Gjykata gjithashtu vlerësoi se marrëveshjet “anti-fragmentim” kufizonin përdorimin e versioneve alternative të Android, duke forcuar edhe më shumë pozitën dominuese të Google.
Në përfundim, vendimi konfirmon se praktikat e kompanisë kanë shkelur rregullat e konkurrencës në tregun digjital europian.
