Nuk mungoi as në shpallje të aktgjykimit.
Me pranga në duar, ish zyrtarja e OSBE-së, u soll në gjykatore për të dëgjuar verdiktin e trupit gjykues për akuzat për spiunazh.
Jelena Gjukanoviq, u shpall fajtore për shpërndarje të informacioneve të ndjeshme tek BIA serbe.
“Dënim me burgim në kohëzgjatje prej 6 vitesh, i cili dënim do të ekzekutohet në afat prej 15 ditësh nga dita e plotfuqishmërisë së këtij aktgjykimi. Në dënimin e shqiptuar me burg, i llogaritet edhe koha e kaluar në paraburgim nga data 28.02.2025 e tutje”, tha Rrahman Beqiri –kryetar i trupit gjykues.
Ky aktgjykim dënues, sipas prokurorit special, Bekim Kodraliu, është rezultat i bashkërendimit mes instituticioneve kyqe të sigurisë.
“Në koordinim të ngushtë me institucionet e sigurisë, me Policinë e Kosovës, departamentin kundër terrorizmit, e në veçanti edhe me Agjencionin e Kosovës për Inteligjencë, dhe si rezultat i këtij bashkëpunimi kemi siguruar prova konkrete dhe të mjaftueshme, me të cilat edhe u vërtetua përtej dyshimit të bazuar mirë se e pandehura Gjukanoviq ka kryer aktivitet të kundërligjshëm, aktivitet i cili ka ndihmuar Agjencionin sekret serb BIA, në implementimin e narrativës së tyre në dëm të interesave të Kosovës”, tha Kodraliu.
Përgjatë gjykimit, prokuroria prezantoi prova materiale se si Gjukanoviq, në mënyrë të vazhdueshme kishte dërguar materiale tek agjentët e BIA-s, me qëllim cenimin e sovranitetit të Kosovës, dhe si kishte marrë udhëzime nga këta agjentë për ta përdorur pozitën e saj si zyrtare e OSBE-së në shtyrjen përpara të agjendës serbe.
E këto prova, sipas mbrojtjes, nuk janë siguruar në mënyrë të ligjshme.
“Këto prova nuk mund të jenë me ligj, për shkak se nuk ka qenë nën urdhërin e Gjykatës për bastisjen e telefonit, e cila është e paraparë me nenin 103 paragrafi 5 të Kodit të Procedurës Penale”, tha avokati Predarag Milkoviq.
Deri në plotfuqishmërinë e këtij aktgjykimi, Gjukanoviq do të mbetet nën masën e paraburgimit.
