Publicisti Kim Mehmeti, në emisionin “Këndi i Kimit” në Tëvë1, ka folur për protestën e studentëve shqiptarë në Maqedoninë e Veriut, të cilët kërkojnë që provimet e jurisprudencës të mbahen në gjuhën shqipe dhe jo në gjuhën maqedonase.
Ai tha se çështja është bërë pjesë e debateve politike në rajon, ndërsa sipas tij, fokusi te problemi i studentëve është zbehur nga përplasjet mes partive shqiptare.
Mehmeti kritikoi edhe mungesën e reagimit të disa forcave politike në Kosovë, përfshirë Vetëvendosjen.
“Lidhur me këtë protestën studentore, Tirana ka qenë shumë korrekte, i ka mbështet të gjitha partitë, qendrat dhe mediat, ndërsa në Kosovë jo, sepse u prishet pak rendi kryeministrit.”
Sipas tij, në vend që të trajtohet kërkesa e studentëve, debati është zhvendosur në garë politike mes subjekteve shqiptare në Maqedoni.
“Ata po bëjnë gara se kush duhet t’i përfaqësojë shqiptarët atje, dhe e kanë harruar popullin dhe rininë që duhet ta japë provimin në gjuhën maqedonase.”
Ai shtoi se, sipas tij, kjo situatë përdoret edhe në komunikim politik me faktorin ndërkombëtar.
“Duan t’u thonë ndërkombëtarëve se ne i kontrollojmë shqiptarët në Maqedoni, që nuk është e vërtetë.”
Mehmeti foli edhe për statusin e gjuhës shqipe në Maqedoninë e Veriut, duke thënë se ajo ende nuk trajtohet si gjuhë plotësisht zyrtare në nivel kushtetues.
“Gjuha shqipe nuk është gjuhë zyrtare si duhet dhe nuk përmendet sa duhet në kushtetutë, edhe pse shqiptarët janë një pjesë e madhe e vendit.”
