Vozitësi Liridon Gashi mbrëmjen e djeshme u aksidentua në udhëkryqin që lidhë lagjen Ulpiana me Dardaninë. E nga Policia u gjobit me 300 euro. Por ekspertët e komunikacionit thonë se sinjalistika rrugore është e gabuar, prandaj gjobitja nuk duhej të kishte ndodhur.
Ishte i pozicionuar në korsinë e dytë.
E kur drita jeshile u ndez, Liridon Gashi vazhdoi rrugën e tij nga lagjja Ulpiana drejt Dardanisë.
Por mu në këtë udhëkryq, atij i ndodhi një incident.
“Mbrëmë në orën 18:30, si e kam kalu semaforin kam pasë aksident. Sipas policisë, nuk kam të drejtë me u kthy në anën e majtë prej shiritit të dytë edhe sipas shenjës”, tha Gashi.
Prandaj nga Policia e Kosovës, Gashi u dënua me 300 euro gjobë.
“E kam nijet me u anku edhe në polici, edhe në komunë, deri në fund kam me e çu këtë ankesë”, tha ai.
Se kjo gjobitje nuk duhej të kishte ndodhur e thotë eksperti i komunikacionit, Bekim Ahmeti.
“Nuk ish dashtë të gjobitet qytetari, arsyeja është se është anomali e sinjalizimit horizontal, qe besa edhe vertikali duhet të ndryshojë, arsyeja është që është blloku rruga ‘’Xhorxh Bush’’, tha Ahmeti.
Tutje Ahmeti sqaron se si do të duhej të ishte sinjalistika në këtë pjesë.
“Ish dashtë të jetë vetëm një korsi drejt që shkon tek parking-garazha edhe kthehet në anën e djathtë, kurse këto dy sosh që janë afër afër të kenë kthime majtas”, tha ai.
E nga komuna e Prishtinës thonë se intervenimi do të jetë i menjëhershëm.
“Me vet faktin që paska një shenjë e cila nuk harmonon me gjendjen reale, ne duhet me intervenu menjëherë. Së paku nesër me e mbyllë, shenjën me e bë të padukshme edhe pastaj me e përshtatë me praktikat e tashme”, tha Bekim Brestovci nga Komuna e Prishtinës.
Rruga “Xhorxh Bush” ishte mbyllur për qarkullim para rreth 8 muajsh, për çka edhe një numër i madh i qytetarëve kishin protestuar duke kundërshtuar një vendim të tillë.
