Kanë mbetur edhe pak ditë përpara se gjiganti nga Turqia, Galatasaray të zbarkoj në Kosovë për të mbajtur kampin e futbollit, në të cilin do të monitoroj talentet e rinj.
Galatasaray në bashkëpunim me Shkollën e Futbollit “Besëlidhja” nga Prishtina, do ta mbajnë këtë kamp, i cili do të funksionoj me programin e ekipit turk.
Po ashtu, kampi do të udhëhiqet nga Hakan Bulut, koordinator i shkollave sportive të Galatasaray kurse do të drejtohet nga stafi zyrtar i klubit, në bashkëpunim me trajnerët vendor.
Ky kamp do të zgjasë pesë ditë dhe do të mbahet prej datës 1 deri më 5 korrik, ndërsa stërvitjet do të mbahen në Kampin Nacional të Federatës së Futbollit të Kosovës (FFK), në Hajvali.
Kampi do të jetë për fëmijët e moshës 6 deri në 17 vjeç, ndërsa numri i tyre është i limituar pasi regjistrimi ka disa javë që ka filluar.
Sipas organizatorëve, gjithçka është gati për mbajtjen e kampit, të cilin do ta monitorojnë edhe skautët e Galatasarayt, pasi kjo është hera e parë që kjo skuadër e madhe mbanë një kamp futbolli në Kosovë.
Kampi i Kosovës është në kuadër të kampeve, që Galatasaray tashmë i ka zyrtarizuar këtë verë për ti mbajtur në Evropë, si Holandë e Gjermani.
