Kandidati për kryeministër nga Aleanca, Ardian Gjini, ka zhvilluar të martën vizita në disa biznese në Mitrovicë, ku është njohur nga afër me aktivitetin dhe sfidat me të cilat përballen sipërmarrësit lokalë.
Gjatë takimeve me përfaqësues të sektorit privat, Gjini vlerësoi kontributin e tyre në zhvillimin ekonomik të vendit, duke i cilësuar bizneset si shtyllë të rëndësishme të ekonomisë së Kosovës.
Ai tha se ka dëgjuar kërkesat dhe shqetësimet e sipërmarrësve, duke theksuar se programi i Aleancës parasheh masa konkrete për krijimin e një ambienti më të favorshëm për bizneset dhe investimet.
“Bizneset vendore kanë nevojë për mbështetje reale dhe politika që u mundësojnë rritje. Për këtë arsye, programi ynë synon të ofrojë siguri, lehtësira dhe perspektivë afatgjatë për sipërmarrësit në gjithë vendin”, deklaroi ai.
Gjini u zotua se masat e parapara në program do të nisin të zbatohen menjëherë pas zgjedhjeve të 7 qershorit, duke shtuar se ato do të ndikojnë drejtpërdrejt në zhvillimin ekonomik dhe krijimin e vendeve të reja të punës.
