Kandidati për kryetar të Vitisë nga Aleanca për Ardhmërinë e Kosovës, Labinot Gjini është zotuar se do të realizojë krijimin e Liqenit të Vitisë në Budrikë të Epërme.
Përveç këtij projekti, Gjini ka premtuar gjithashtu një liqe tjetër në afërsi të fshatit Pozhoran dhe ndërtimin e 120 apo 130 akumuluesve të ujit.
“Aty është pellg nëntokësor dhe janë të gjitha ujërat mbitokësore të cilat mblidhen po në atë pikë, pra kjo Zonë Ekonomike është në Budrikë të Epërme dhe është vendi i vetëm ku Vitia mund të ketë liqen. Prandaj kjo Zonë Ekonomike nuk do të funksionoj më sepse ne do ta shkatërrojmë dhe do të marrim vetëm ato elemente që do të na duhen për të bërë Liqenin e Vitisë, i cili është i domosdoshëm. Përveç këtij liqeni që do ta bëjmë në Budrikë, një tjetër liqen që do të jetë shumë herë më i vogël do të jetë afër Pozhoranit, në pjesën e Epërme në drejtim të Vitisë. Po ashtu do të bëhen edhe 120 deri në 130 akumulues të ujit të cilat janë me dimensioneve 500 metër apo 1 mijë metër varësisht sipas vendeve sesa ka burime të ujit apo mundësi për t’i krijuar këto akumulues”, ka thënë Gjini në emisionin “Ditari” në Tëvë1.
