Kapiteni i Shqipërisë, Berat Gjimshiti foli në konferencë për shtyp, në prag të ndeshjes me Letoninë.
Ai e cilësoi si ndeshje shumë të rëndësishme, ndërsa shtoi se lojtarët do të japin gjithçka për të marrë fitoren.
Shqipëria, të martën mbrëma në stadiumin “Air Albania” përballet me Letoninë në kuadër të kualifikimeve për Botërorin 2026.
“Ndeshja që luajtëm në Letoni nuk ishte ashtu si në donim. Nuk është më si para disa vitesh, që të fitosh thjeshtë. Dje po shikoja Holandën me Lituaninë 3-2., Nesër do të jetë një ndeshje ndryshe. Na duhen me çdo kusht 3 pikët për të shpresuar te Botërorit. E kemi ende vetë në dorë dhe kjo është e rëndësishme”, tha Gjimshiti.
Mbrojtësi pati edhe një mesazh për tifozët.
“Mesazhi për tifozët është që do të japim maksimumin, për të realizuar ëndrrën. Duam Botërorin, do të ishte historike. Do ishte diçka shumë e mirë. Nesër do të jemi gati. Do të japim gjithçka për të marrë 3 pikët. Mendoj se përqendrimi këtë herë do të jetë ndryshe. Dëshira është brenda grupit. Për tu kualifikuar në Botëror është rasti më i mirë që kemi”, shtoi Gjimshiti.
Sipas tij, Letonia është një mundësi që nuk duhet lëshuar për të marrë pikët e plota në shtëpi.
“E dimë që është rasti i fundit për të synuar Botërorin. Besoj se skuadra është mirë dhe e vetëdijshme, që kjo ndeshje mund ta ndryshojë situatën në grup dhe ta kalojmë presionin te kundërshtarët. Nëse luan me kombëtare që duken të vogla, luajnë mbrapa. Me Serbinë loja ishte më e hapur dhe të lënë mundësi shënimi. Me Letoninë është më ndryshe, sepse luajnë mbrapa. Duhet që lojtarët që kanë teknikë, për të kaluar kundërshtarin”, tha Gjimshiti.
