Kapiteni i Kombëtares së Shqipërisë, Berat Gjimshiti pritet të rikthehet në fushë tek Atalanta këtë vikend në kuadër të kampionatit italian.
Mediumet italiane raportojnë të enjten se Gjimshiti është rikuperuar plotësisht dhe ka disa ditë që po stërvitet me pjesën tjetër të ekipit, duke aluduar se mbrojtësi është gati për duelin kundër Venezias.
Kjo ndeshje luhet të dielën prej orës 15:00 dhe i takon javës së 8-t të Serie A, ndërsa Gjimshiti pritet të aktivizohet prej minutës së parë.
Gjimshiti u lëndua në fillim të këtij muaji dhe Atalantas i mungoi në duelin kundër Genoas të luajtur më datën 5 tetor.
Po ashtu, Gjimshiti shkaku i lëndimit nuk u grumbullua te Kombëtarja e Shqipërisë për ndeshjet e këtij muaji në Ligën e Kombeve kundër Çekisë dhe Gjeorgjisë.
31-vjeçari ka 9 paraqitje këtë sezon për Atalantan në të gjitha garat, si dhe një gol të shënuar në Ligën e Kampionëve.
