Legjendat e Manchester United, Gary Neville dhe Wayne Rooney, kanë lëshuar një paralajmërim të fortë ndaj klubit pas humbjes në ndeshjen hapëse të Ligës Premier ndaj Arsenalit.
Gabimi i rëndë i portierit Altay Bayindir, i cili u preferua titullar në vend të Andre Onanës, i dhuroi “Topçinjve” golin e vetëm të ndeshjes në “Old Trafford”, ku Riccardo Calafiori shënoi me kokë pas një daljeje të pasigurt të turkut në këndoren e Declan Rice.
Edhe pse trajneri Ruben Amorim u përpoq ta mbronte portierin e tij, duke thënë se ishte i penguar nga lojtarët e Arsenalit, Neville dhe Rooney nuk u bindën dhe theksuan se Man United duhet të reagojë urgjentisht sa është i hapur afati kalimtar.
Neville përmendi dy emra të mëdhenj si zgjidhje: Emiliano Martinez (Aston Villa) dhe Gianluigi Donnarumma (PSG).
“Man United ka nevojë për një portier dominant që e zotëron zonën e tij. Martinez dhe Donnarumma kanë personalitet, kanë luajtur në finale të mëdha dhe mund ta përballojnë presionin. Kjo çështje duhet zgjidhur tani”, tha ish-kapiteni i Man United në podcastin e tij për Sky Sports.
Rooney, ndërkohë, e mbështeti idenë e Neville duke insistuar te Donnarumma.
“Ai është vetëm 26 vjeç dhe një nga më të mirët në botë. Më kujtohet kur nuk kishim besim të plotë te portierët tanë, derisa erdhi van der Sar që solli qetësi. Man United ka nevojë për një figurë të tillë sot, dhe Donnarumma është njeriu i duhur”, deklaroi Rooney.
Situata e portës pritet të dominojë diskutimet përpara ndeshjes së vështirë ndaj Fulhamit këtë fundjavë si mysafir.
Sipas The Sun, Man United ka marrë sinjale edhe për një rikthim të mundshëm të David De Gea, i cili aktualisht është te Fiorentina dhe ka një klauzolë që e lejon të largohet për një shumë të vogël.
Spanjolli ka ruajtur portën e Man Utd për 12 vite para se të largohej nga klubi, por sezonin e fundit te Fiorentina, ai tregoi formë të lartë.
