Dy futbollistët nga Maqedonia e Veriut, mbrojtësi Egzon Bejtullai dhe sulmuesi i krahut, Valmir Nafiu nuk janë më pjesë e skuadrës së Gjilanit.
Ekipi nga Superliga e Kosovës ka njoftuar të enjten ndërprerjen e bashkëpunimit me këta dy lojtarë. Në njoftimin e klubit, thuhet se ndërprerja e bashkëpunimit ka ardhur me marrëveshje të dyanshme.
Po ashtu, Gjilani ka falënderuar dyshen për kontributin, duke i dëshiruar suksese në karrierë.
Si Bejtullai ashtu edhe Nafiu, iu bashkuan Gjilanit në fillim të këtij edicioni, ndërsa ekipi stinorin vjeshtor e mbylli në pozitën e tetë në tabelë me 18 pikë të mbledhura pas po aq ndeshjeve të luajtura. Nafiu pati 12 paraqitje kampionale ku kontribuoi me dy asistime, ndërsa Bejtullai ka regjistruar shtatë ndeshje me fanellën e Gjilanit.
