Basketbollistet e Bashkimit kanë triumfuar në finalen e Kupës së Kosovës për sezonin 2025/26.
Në finalen e luajtur të mërkurën mbrëma, Bashkimi mposhti ekipin e Peja 03.
Ndeshja e luajtur në palestrën “Sezai Surroi”, në Prizren, u mbyll me shifrat 70:61 në favor të Bashkimit.
Në një atmosferë të mirë, finalja ishte e fortë, dramatike dhe tejet interesante, ku të dyja skuadrat u angazhuan maksimalisht.
Peja 03 ishte më e mirë në dy çerekët e parë dhe ishte në epërsi, por Bashkimi u rikthye fuqishëm në dy periudhat e fundit për ta siguruar fitoren.
Më të dalluarat te Bashkimi ishin amerikanet Destiny Nichole dhe Alexis Mead, që ishin të pandalshme.
Nichole ndeshjen e mbylli me 21 pikë e 15 kërcime, ndërsa Mead shtoi 28 pikë, 6 kërcime e 8 asistime.
Madje, Mead u zgjodh edhe MVP i finales së Kupës.
Te Bashkimi impresionoi edhe Saranda Daci me 6 pikë e 10 kërcime.
Te Peja 03, u veçua Ariel Colon me 22 pikë të shënuara.
Për Bashkimin, kjo është Kupa e nëntë në histori të klubit, ndërsa e pesta rresht.
Trofeun e ngriti kapitenia e Bashkimit, Aulona Muhadri që ia dorëzoi kreu i FBK-së, Arben Fetahu.
