Deputeti i Lëvizjes Vetëvendosje, Enver Dugolli, thotë se pavarësisht që e kanë votuar kandidatin e Listës Serbe, Sllavko Simiq për nënkryetar të Kuvendit të Kosovës, subjekti i tij politik nuk ka ndryshuar qëndrim.
Dugolli tha se me aktvendimin e fundit të Kushtetueses “i janë mbyllur të gjitha dyert” për gjetjen e një zgjidhjeje tjetër. Ai shtoi se mos-votimi do të sillte pasoja shumë më të mëdha për shtetin dhe qytetarët, pasi Kuvendi nuk mund të quhet i konstituuar pa nënkryetarin e propozuar nga Lista Serbe.
“Me aktvendimin e fundit, Gjykata Kushtuese i ka mbyllur të gjitha dyert, ka qenë e pamundur që të provohet ndonjë mënyrë tjetër. Krejt çfarë kish mundur të ndodhë do të ishte që t’i sjellim vendit dëm të madh dhe do t’i sjellim një varg pasojash të mëdha për shtetin. Kështu që edhe me dakordimin e partive tjera politike opozitare janë marrë vesh që të votohet në pako”, deklaroi ai në emisionin “Info Nata” në Tëvë1.
Ai thotë se LVV ende ka qëndrim të njëjtë karshi aktvendimit të Gjykatës Kushtetuese që nënkryetarët e Kuvendit të votohen në pako.
“Ne s’kemi ndryshuar qëndrim. Ne kemi thënë që jemi të pakënaqur me aktvendimin e Gjykatës Kushtetuese, e kemi kritikuar. Madje, nuk kemi kursyer as fjalë, as qëndrime. Sepse, mendojmë që ka qenë një aktvendim jo i drejtë. Mirëpo, deri sot asnjë aktgjykim i Gjykatës Kushtetuese nuk ka mbetur pa u zbatuar. Prandaj, edhe ndonëse e kemi kritikuar e kemi zbatuar”, deklaroi ai. /teve1.info/
