Gjilani e ka fituar me vështirësi në udhëtim te Dukagjini, në kuadër të xhiros së pestë në Superligën e Kosovës.
Takimi i zhvilluar në stadiumin “18 Qershori” në Klinë, i takoi gjilanasve që fituan me rezultatin 1:0.
Skuadra gjilanase në pjesën e parë qëlloi dy herë shtyllën, ndërsa golit iu gëzua në minutën e 38-të. Theophilus Solomon realizoi me të majtën, pasi u shmang bukur nga qendërmbrojtësi Ilir Syla në zonë.
Me këtë fitore, Gjilani mbetet i vetëm në krye të tabelës me 13 pikë në pesë ndeshje të luajtura. Ka katër fitore e një barazim. Nga ana tjetër, Dukagjini mbetet i fundit në tabelë me një pikë në pesë ballafaqime.
Kurse pa gola është mbyllur ndeshja në mes të Drenicës dhe Ferizajt. Takimi i luajtur në stadiumin “Bajram Aliu” në Skenderaj.
Drenica në fund të takimit mbeti me një lojtar më pak në fushë. Ermal Veliqi u përjashtua me karton të kuq pas goditjes me bërryl ndaj futbollistit ë Ferizajt në minutën e 86-të. Kartonin e kuq gjyqtari Mervan Bejtullahu ia ndau pasi pa situatën në ekranin e VAR-it. Në finishin e takimit pati edhe ndërhyrje tjera të ashpra.
