Për vitin 2024-të, në Ministrinë e Punëve të Jashtme dhe Diasporës u numëruan disa gjetje nga Zyra Kombëtare e Auditimit.
ZKA-ja gjeti që në këtë institucion mungon një rregullore për pranimin e stafit lokal në Misione Diplomatike.
Kjo sipas tyre, rrit rrezikun për trajtim të pabarabartë.
“Gjatë testimit të procedurave të rekrutimit të stafit lokal, në një rast në Ambasadën e Kosovës në Bern dhe tjetrën në Konsullatën e Cyrih, në të dy rastet kemi vërejtur se procesi i pranimit apo rekrutimit nuk është bazuar në ndonjë rregullore të veçantë të MPJD-së. Po ashtu, kontrata për punësim nuk përmban preambulë ku të bëhet referimi ligjor mbi të cilin është bazuar rekrutimi. Për më tepër, pagat e stafit paguhen nga kategoria e mallrave dhe shërbimeve”, thuhet nga Zyra Kombëtare e Auditorit.
Brenda kësaj ministrie, u gjet edhe dobësi në menaxhimin e subvencioneve.
Sipas të gjeturave, kontratat që janë nënshkruar nga MPJD-ja dhe OJQ-të përfituese nuk kanë përmbushur kriteret e kërkuara.
“Te financimi i projektit “Kampi Rinor me të Rinjtë nga zonat rurale të Kosovës dhe të Diasporës” në vlerë 17 mijë e 500 euro, në dosjen e aplikimit përfituesi kishte paraqitur një Vërtetim Tatimor të lëshuar nga Administrata Tatimore e Kosovës. Megjithatë, vërtetimi në fjalë kishte të skaduar periudhën e vlefshmërisë. Përveç kësaj, edhe pse ishte kërkuar paraqitja e dëshmive për dorëzimin e deklaratës vjetore të tatimore ose pasqyrave financiare, nuk kemi siguruar asnjë dëshmi që konfirmon dorëzimin e këtyre deklaratave nga ana e përfituesit dhe përfituesi i subvencionimit nuk kishte dorëzuar raportin financiar dhe as atë narrativ, ashtu sic kërkohet në kushtet e kontratës”, thuhet në raport.
Po ashtu është gjetur që ka pasur klasifikim jo adekuat të shpenzimeve që sipas ZKA-së ishte rezultat i planifikimit jo adekuat të buxhetit.
Ndërsa ajo që është e përsëritur nga viti 2023-të është për mallrat dhe shërbimet dhe komunalitë, që ka të bëjë me mangësi në monitorimin e kontratave.
